Lider.com.az istinadən bildirir ki, Fransada həyat bahasına qarşı təşkil edilən ümummilli etirazların üçüncü dalğasında toplam 320 min insan qatılıb.
Ölkənin Daxili İşlər Nazirliyinin yaydığı məlumata görə, oktyabrın 31-də baş tutan nümayişlərdə yalnız Paris şəhərində 70 min vətəndaş iştirak edib. Gənclərin həmkarlar ittifaqları qurumu isə bütün respublika üzrə etirazçıların sayının 500 minə çatdığını iddia edib.
Müqayisə üçün qeyd edək ki, oktyabrın 24-dəki aksiyalarda rəsmi rəqəmlərə əsasən 410 min, oktyabrın 17-də isə 550 min iştirakçı qeydə alınmışdı. Tədbir təşkilatçıları isə sonuncu aksiyaya 800 min nəfərin qoşulduğunu bildirmişdilər.
Oktyabrın 31-də yerli vaxtla saat 18:00-dək nümayişlər zamanı baş verən iğtişaşlara görə 296 nəfər saxlanılıb.
Daxili İşlər Nazirliyindən bildirilib ki, əvvəlcədən razılaşdırılmış yürüşlər əsasən sakit keçsə də, Bordo, Tuluza, Renn, Lill, Nant, Marsel və Lion şəhərlərində radikal dəstələr mərkəzi küçələrə soxularaq asayişi pozmağa və qarətlər törətməyə cəhd göstəriblər.
Ən gərgin vəziyyət Nant və Marsel şəhərlərində yaşanıb. Nantda hüquq-mühafizə orqanları etirazçılara qarşı su şırnaqları və gözyaşardıcı qaz tətbiq ediblər. Həmkarlar ittifaqlarının məlumatına görə, həmin şəhərdə yürüşə 15 min nəfər qatılıb.
Marseldə aksiyanın qızğın vaxtında 10 min insan iştirak edib. Yerli vaxtla saat 16:00-dan etibarən isə nümayişçilər və polis qüvvələri arasında toqquşmalar başlanıb.
Rəsmi rəqəmlərə əsasən, Lionda 19 min, Bordoda 11 min, Nitsada isə 4200 sakin etirazlara qoşulub.
Paytaxt Parisdə təhlükəsizlik tədbirləri çərçivəsində 40-dan artıq metro stansiyasının fəaliyyəti dayandırılıb. Ümumilikdə ölkə üzrə ictimai asayişin qorunmasına 70 min polis və jandarm cəlb olunub.
Dövlət Şurası paytaxtda Bastiliya meydanından Nasion meydanına qədər yürüşün keçirilməsini təsdiqləyən məhkəmə qətnaməsini ləğv edib. Bunun əvəzinə nümayişçilər üçün şəhərin kənar hissəsindən keçən alternativ marşrut müəyyənləşdirilib.
Paris, Lion, Marsel və Bordo daxil olmaqla, bir sıra yaşayış məntəqələrində böyüklərin müşayiəti olmadan küçəyə çıxan yetkinlik yaşına çatmayanlar üçün komendant saatı elan edilib.
Tələbə birlikləri çərşənbə və cümə axşamı lisey və universitetlərin işini bloklamağa, noyabrın 5-də isə həmkarlar ittifaqlarının çağırışı ilə yeni kütləvi aksiyalar təşkil etməyə çağırışlar səsləndiriblər.
Bu arada, oktyabrın 28-də Fransa Senatı kütləvi iğtişaşlar zamanı dəyən maddi zərərə görə kollektiv maliyyə məsuliyyətini nəzərdə tutan qanun layihəsini təsdiqləyib. Sənədin lehinə 229, əleyhinə isə 105 senator səs verib.
Qəbul edilən layihəyə əsasən, zorakılıq və əmlaka ziyan vurmaq məqsədilə formalaşdırılan qruplarda bilərəkdən iştirak edən, yaxud polisin ərazini tərk etmək barədə tələblərinə məhəl qoymayaraq hadisə yerində qalan şəxslərdən zərərin ödənilməsi tələb oluna bilər. Bu qayda zərəri bilavasitə törətməyənlərə də şamil edilir.
Bir nəfərdən tutula biləcək ən yüksək məbləğ 10 min avro həddində müəyyənləşdirilib.