Lider.com.az istinadən bildirir ki, Birləşmiş Ştatlarda Konqresə keçiriləcək aralıq seçkiləri ilə əlaqədar indiyədək erkən səsvermə hüququndan 50 milyondan artıq vətəndaş istifadə edib.
Yerli kütləvi informasiya vasitələrinin yaydığı məlumata əsasən, Florida Universitetinin apardığı hesablamalara görə, şənbə gününə olan göstəricilərə əsasən vaxtından əvvəl səs verənlərin ümumi sayı 50,5 milyon nəfərə çatıb ki, bu da 2022-ci ildə baş tutan əvvəlki aralıq seçkiləri ilə müqayisədə təqribən 5 milyon nəfər çoxdur.
Erkən səsvermə prosesində fəallığın artması xüsusilə əvvəllər Respublikaçılar Partiyasının üstünlük təşkil etdiyi Texas, Alyaska və Kanzas əyalətlərində qeydə alınır və cari ildə həmin regionlarda siyasi qüvvələr arasında seçici səsləri uğrunda gərgin mübarizə aparılır.
Belə ki, Texas ştatında erkən səsvermədə iştirak edənlərin miqdarı artıq 7 milyonunu ötüb ki, bu da 2022-ci ilin müvafiq dövrü ilə müqayisədə 1,5 milyon nəfər artıq deməkdir, eyni zamanda Kanzasda bu göstərici 34 faiz, Mendə 44 faiz, Miçiqanda isə 32 faiz yüksəlib.
Məlumatda həmçinin bildirilir ki, ABŞ-nin dövlət başçısı Donald Tramp və xanımı Melaniya Tramp da vaxtından əvvəl səsvermə proseduruna qoşulublar, halbuki əvvəllər prezident seçki günündə şəxsən səs verməyə üstünlük verdiyini dilə gətirmişdi.
Əsas səsvermə prosesi noyabrın 3-də baş tutacaq və bu seçkilər zamanı Nümayəndələr Palatasının tam heyəti, yəni 435 üzvü, həmçinin Senatın üçdəbirlik hissəsi yenidən formalaşdırılacaq.
Hazırda ABŞ Konqresinin hər iki qanunverici palatasına Respublikaçılar Partiyası tərəfindən nəzarət həyata keçirilir.