Lider.com.az istinadən bildirir ki, Ekologiya və Təbii Sərvətlər Nazirliyinin Meşələrin İnkişafı Xidmətinin 7 saylı Regional Meşə Təsərrüfatı Mərkəzinin rəhbəri Fizuli Məmmədov rüşvət tələb etməkdə günahlandırılaraq azadlıqdan məhrum edilib, meşəbəyi Vidadi Əsgərov barəsində isə ev dustaqlığı qətimkan tədbiri tətbiq olunmaqla yanaşı, o, vəzifəsindən kənarlaşdırılıb.
Bu barədə Baş Prokurorluq və Ekologiya və Təbii Sərvətlər Nazirliyi birgə açıqlama yayıblar.
Vurğulanıb ki, qurumdan göndərilən materiallar əsasında Baş prokuror yanında Korrupsiyaya qarşı Mübarizə Baş İdarəsində araşdırma aparılaraq cinayət işi açılıb.
Başlanğıc istintaq hərəkətləri nəticəsində Fizuli Məmmədovun 2025–2026-cı illərdə Vidadi Əsgərovla birgə razılığa gələrək meşə fonduna aid torpaqların icarəyə verilməsi müqabilində müxtəlif miqdarda pulu rüşvət qismində əldə etmələrinə dair kifayət qədər əsaslar aşkarlanıb.
Toplanan dəlillər nəzərə alınaraq hər iki şəxsə Cinayət Məcəlləsinin 311.3.1, 311.3.2 və 311.3.3-cü maddələri üzrə — qabaqcadan əlbir olan bir qrup şəxs tərəfindən təkrarən külli miqdarda rüşvət alma ittihamı irəli sürülüb.
Məhkəmə instansiyasının hökmü ilə Fizuli Məmmədov həbs olunub, Vidadi Əsgərov barəsində isə əsas qətimkan tədbiri qismində ev dustaqlığı, eləcə də əlavə tədbir olaraq vəzifədən uzaqlaşdırma qərarı verilib.
Hazırda cinayət işi üzrə istintaq həmçinin əməliyyat tədbirləri davam etdirilir.