Lider.com.az istinadən bildirir ki, Qazaxıstan “Drujba” neft kəməri vasitəsilə xammal ixracını yenidən işə salmaq məqsədilə Rusiyaya rəsmi sorğu ünvanlayıb və hazırda cavab gözləyir.
Astanada təşkil olunan mətbuat konfransında çıxış edən Qazaxıstanın energetika naziri Yerlan Akkenjenov məlumatı diqqətə çatdırıb.
Nazir bildirib ki, həmin rəsmi müraciəti şəxsən özü təqdim edib və Qazaxıstan tərəfi tədarükün yenidən bərpası barədə qarşı tərəfin cavabını gözləyir.
Eyni zamanda vurğulanıb ki, respublikanın bu istiqamətdə neft nəqlini əvvəlki qaydada davam etdirmək üçün lazım olan texniki potensialı mövcuddur.
Xatırladaq ki, Rusiya cari ilin may ayından etibarən “Drujba” boru kəməri sistemi vasitəsilə Qazaxıstan mənşəli neftin Almaniyaya tranzitini dayandırmışdı.
Qazaxıstan 2025-ci ildə sözügedən marşrutla Almaniyanın Şvedt şəhərində yerləşən neft emalı zavoduna ümumilikdə 2,1 milyon ton neft nəql edib, növbəti ildə isə bu xətlə təxminən 3 milyon ton neft ixrac etməyi nəzərdə tutur.