Lider.com.az istinadən bildirir ki, müasir dövrdə siyasi qütbləşmələrin dərinləşdiyi, həmçinin mədəni və ideoloji ziddiyyətlərin kəskinləşdiyi fonunda beynəlxalq səviyyədə dialoq platformalarına ehtiyac durmadan artır. Qlobal miqyasda geosiyasi gərginliyin yüksəldiyi bir vaxtda Bakıda təşkil olunan Ümumdünya Mədəniyyətlərarası Dialoq Forumu sadəcə növbəti tədbir deyil, həm də qarşılıqlı anlaşmaya və sülhə xidmət edən mühüm mexanizmdir.
Bakı şəhəri oktyabrın 27-dən etibarən "Ortaq gələcək naminə dialoq" şüarı altında VII Ümumdünya Mədəniyyətlərarası Dialoq Forumuna evsahibliyi edir. Tədbirin iştirakçılarının tərkibi və miqyası bu formata beynəlxalq səviyyədə böyük marağın olduğunu bir daha nümayiş etdirir. Forumun açılış mərasimində çıxış edən Prezident İlham Əliyev bildirib ki, qeydiyyatdan keçmiş iki mindən çox iştirakçı və yüzdən artıq ölkədən gələn beş yüzdən çox qonaq ötən on beş il ərzində bu tədbirin mədəniyyətlərarası münasibətlərin tənzimlənməsi istiqamətində əhatəli və səmərəli platformaya çevrildiyini açıq şəkildə göstərir.
Ötən dövr ərzində əldə olunan nəticələr təsdiqləyir ki, sözügedən Forum Birləşmiş Millətlər Təşkilatı və onun strukturları tərəfindən dözümsüzlüyə, irqi ayrı-seçkiliyə qarşı mübarizə, həmçinin mədəniyyətlərarası əlaqələrin qurulması sahəsində qlobal status qazanıb. Azərbaycanda bu tədbirin keçirilməsinin isə həm də dərin mənəvi kökləri mövcuddur, çünki ölkə ərazisində tarix boyu multikultural dəyərlər üstünlük təşkil edib. Burada heç vaxt milli və ya dini zəmində qarşıdurmalar yaşanmayıb, əksinə, müxtəlif xalqların nümayəndələri qarşılıqlı hörmət və qardaşlıq şəraitində yaşayıblar.
Dövlət başçısı VII Forumdakı çıxışında vurğulayıb ki, ölkə Konstitusiyasına uyğun olaraq bütün dinlərin və etnik qrupların nümayəndələri bərabər hüquqlara malik olmaqla yanaşı, vahid ailə kimi yaşayırlar və bu gün Azərbaycanda həmrəyliyin ən yüksək səviyyəsi hiss olunur. Respublika ərazisində yaşayan bütün icmalar Ulu Öndər Heydər Əliyevin banisi olduğu azərbaycançılıq ideologiyası ətrafında sıx birləşiblər. Bu ideyanın xalqı vahid məfkurə ətrafında birləşdirməsinin ən bariz nümunəsi isə 44 günlük Vətən müharibəsində əldə edilən tarixi zəfərdir.
Prezident İlham Əliyev qeyd edib ki, İkinci Qarabağ müharibəsi zamanı bütün etnik və dini qrupların təmsilçiləri ərazi bütövlüyünü bərpa etmək, ədaləti müdafiə etmək və milli kimliyi qorumaq üçün “Dəmir yumruq” kimi birləşərək vuruşdular. Avropa ilə Asiya arasında mədəniyyət körpüsü rolunu oynayan Azərbaycan belə mötəbər tədbirlərin təşkili üçün unikal məkan olmaqla yanaşı, Şərqlə Qərbin kəsişməsində dinc yanaşı yaşamaq nümunəsini qlobal diplomatiyada uğurla tətbiq edir.
Azərbaycan lideri çıxışında ölkənin keçdiyi şərəfli yola, torpaqların işğaldan azad olunması və tarixi ədalətin bərpası prosesinə toxunaraq beynəlxalq birliyə mühüm mesajlar ünvanlayıb. O diqqətə çatdırıb ki, kənar güclərin ölkənin daxili işlərinə müdaxilə etmək cəhdləri qətiyyən yolverilməzdir və heç kimin müstəqil dövlətə necə yaşamağı diktə etməyə mənəvi haqqı yoxdur. Xarici siyasətində müstəqil xətt izləyən Azərbaycan başqalarının işinə qarışmadığı kimi, özünə qarşı təzyiq cəhdlərini də qətiyyətlə rədd edir.
BMT Təhlükəsizlik Şurası qətnamələrinin icra mexanizmlərinin təsirsizliyi məsələsinə yenidən qayıdan Prezident İlham Əliyev otuz il ərzində ölkənin üzləşdiyi ikili standartları və ədalətsizliyi faktlarla xatırladıb. Müharibələrə başlamanın asan, lakin sülhə nail olmağın və onları dayandırmağın çətin olduğunu qeyd edən dövlət başçısı, Vətən müharibəsindən dərhal sonra irəli sürülən sülh təşəbbüslərinin Cənubi Qafqazda yeni reallıqlar yaratdığını bildirib. İki supergüc – ABŞ və Çin, həmçinin Avropa İttifaqının on üzvü ilə strateji tərəfdaşlıq əlaqələrinə malik olan Azərbaycan beynəlxalq aləmdə etibarlı tərəfdaş kimi tanınıb.
Bütün bu uğurlar və ölkənin artan beynəlxalq nüfuzu Prezident İlham Əliyevin praqmatik siyasətinin və qətiyyətli liderliyinin nəticəsidir. Ədaləti öz gücü ilə bərpa edən və ikili standartlara qarşı çıxan Azərbaycan sülhün və əməkdaşlığın mümkünlüyünü bütün dünyaya sübut edib. VII Ümumdünya Mədəniyyətlərarası Dialoq Forumu bir daha təsdiqlədi ki, ölkə qlobal miqyasda sivilizasiyalararası anlaşmanın möhkəmlənməsinə mühüm töhfələr verməkdə davam edir.