Lider.com.az istinadən bildirir ki, Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev "X" sosial şəbəkəsindəki səhifəsində "AnewZ" telekanalında yayımlanan və tanınmış beynəlxalq fotojurnalist Reza Deqatinin obyektivindən Qarabağdakı müharibə izlərinin araşdırılmasına həsr olunan sənədli ekran əsərini izləyicilərlə bölüşüb.
Paylaşılan filmdə münaqişənin başa çatmasından onilliklər keçməsinə baxmayaraq, viran qoyulmuş tikililərin, zərər çəkmiş mədəni irsin və yox olmaqda olan keçmiş izlərinin dağıdılmış talelərə, habelə unudulmamalı olan tarixlərə işıq saldığı vurğulanır.
Ekran işində qeyd olunur ki, bölgədə həyata keçirilən bərpa və quruculuq tədbirləri əraziyə yeni başlanğıclar qazandırsa da, itkin düşən şəxslərin taleyi yaxınları üçün hələ də sağalmayan açıq yara olaraq qalmaqdadır.
Filmdə keçmişin xarabalıqlarından tutmuş hələ də cavab gözləyənlərin səslərinə qədər cəmiyyətə dərindən düşündürən bir sual ünvanlanır: "Müharibə həqiqətən nə vaxt bitir - və ailələr hələ də cavab axtardığı halda, onun hekayəsi nə vaxtsa tamamlana bilərmi?"
Sonda bildirilir ki, bəzi hekayələr heç vaxt keçmişdə qala bilməz, çünki onlar yarımçıq qalaraq yaddaş, həqiqət axtarışı və davamlı sülh ümidi vasitəsilə yaşadılır.