Lider.com.az istinadən bildirir ki, ölkəmizdə "Korrupsiya ilə əlaqədar hüquqpozmalarla bağlı məlumat verən şəxslərin həvəsləndirilməsi və müdafiəsi haqqında" yeni qanun layihəsi işlənib hazırlanıb.
Parlamentin iclasında müzakirəyə çıxarılan bu sənəd 5 fəsil və 19 maddədən ibarətdir; o, dövlət və yerli özünüidarəetmə qurumlarında, dövlət və ya bələdiyyə mülkiyyətində olan, yaxud paylarının nəzarət zərfi həmin qurumlara məxsus olan hüquqi şəxslərdə, eləcə də publik hüquqi şəxslərdə, büdcə təşkilatlarında və digər təşkilatlarda korrupsiya xarakterli hüquqpozmalar barədə məlumatların çatdırılması və araşdırılması qaydalarını müəyyənləşdirir, həmçinin xəbər verən şəxslərin müdafiəsi ilə həvəsləndirilməsinə yönələn tədbirlərin hüquqi-təşkilati əsaslarını tənzimləyir.
Şəxsi maraqların təmin edilməsi, özü və ya digər şəxslər üçün qanunsuz olaraq maddi nemətlər, imtiyazlar və güzəştlər əldə etmək məqsədilə bilərəkdən yalan və ya böhtan xarakterli məlumatların ötürülməsi korrupsiya hüquqpozması haqqında məlumat verilməsi kimi qəbul olunmur.
Belə məlumatlarda fiziki şəxslərin və istənilən mülkiyyət növünə malik hüquqi şəxslərin qanuni mənafelərinin qorunması məqsədilə əldə olunmasına məhdudiyyət qoyulan peşə, kommersiya, istintaq, məhkəmə sirləri, habelə şəxsi və ailə həyatına aid məlumatlar mövcud olduqda, həmin məlumatların təqdim edilməsi onların qanunazidd şəkildə açıqlanması demək deyil.
Tələblərə cavab verən məlumatı qəbul edən subyektlər həmin şəxsin müvafiq statusda tanınması barədə qərar çıxarmalı və onun surətini dərhal poçt və ya elektron vasitələrlə məlumat verənə göndərməlidirlər.
Korrupsiyaya dair məlumatın təqdim olunması ilə cinayət işi başlandığı təqdirdə, xəbər verən şəxs öz razılığı ilə şahid qismində dindirilə bilər.
Məlumatın sonradan yanlış olduğu üzə çıxsa belə, əgər onu verən şəxs bunu əhəmiyyətli yanılma nəticəsində edibsə, yenə də həmin Qanunla nəzərdə tutulan müdafiə tədbirlərindən yararlanacaq.
Layihəyə əsasən, verilən məlumat təsdiqini taparsa, məlumat verən şəxsə təşkilatın büdcəsi və ya büdcədənkənar vəsaitləri hesabına rəhbərin qərarı əsasında maddi mükafat veriləcək.
Mükafat faktın araşdırılaraq təsdiqlənməsi barədə şəxsin məlumatlandırıldığı tarixdən etibarən 10 iş günü ərzində ödənilməlidir.
Bu ödəniş prosesində konfidensiallıq tələblərinə tam riayət olunmalı və icraçı şəxslər tərəfindən məlumat verən şəxsin şəxsiyyəti üçüncü tərəflərə açıqlanmaməlidir.
Mükafatın ümumi məbləği minimum əməkhaqqının 25 mislindən artıq ola bilməz.
Bu məbləğ hesablanarkən hüquqpozmanın xarakteri, faktların miqdarı, məlumatın pozuntunun aşkar edilməsindəki rolu, vurulan ziyanın və bərpa olunan aktivlərin həcmi nəzərə alınacaq.
Səlahiyyətli struktur bölmə və ya şəxs məlumatı qəbul edən kimi onu qeydiyyata almalı və bu barədə məlumat verən şəxsi xəbərdar etməlidir.
Qeydiyyata alındığı gündən etibarən 20 iş günü ərzində həmin məlumat araşdırılmalı və nəticə poçt və ya elektron formada müraciət edənə çatdırılmalıdır.
Əlavə materialların toplanması zərurəti yarandıqda, təşkilat rəhbəri bu müddəti 10 iş günü uzatmaq səlahiyyətinə malikdir və bu barədə məlumat verən şəxsə xəbər verilir.
Sənəd səsverməyə qoyularaq birinci oxunuşda parlament tərəfindən qəbul edilib.