Lider.com.az istinadən bildirir ki, Amerika Birləşmiş Ştatları Müdafiə Nazirliyi ölkə daxilindəki strateji hərbi düşərgələrin irimiqyaslı savaş zamanı xarici təminatdan asılı olmayaraq ən azı üç ay boyunca özbaşına fəaliyyət göstərməsini reallaşdırmağa hazırlaşır.
Sözügedən məlumatı “Fox News” telekanalı yayıb.
Qeyd olunub ki, Pentaqonun “FORTRESS America” təşəbbüsü dairəsində ölkənin materik hissəsində yerləşən iri hərbi obyektlər su, elektrik enerjisi, rabitə və yanacaq baxımından mülki şəbəkələrə ehtiyac duyulmadan 90 gün ərzində işləməyə qadir olmalıdırlar.
ABŞ müdafiə nazirinin ictimaiyyətlə əlaqələr üzrə köməkçisi Şon Parnell qeyd edib ki, dövlətin müdafiə potensialının mülki kommunal sistemlərdən asılı vəziyyətdə olması böyük təhlükə törədir.
“Milli müdafiə məsələsində adi mülki infrastruktura bağlı olmaq istəmirik. Buna yol verə bilmərik. Bu, qəbuledilməz riskdir”, – deyə Parnell vurğulayıb.
Onun dediklərinə görə, Birləşmiş Ştatların təhlükəsizlik doktrinası uzun müddət ərzində ölkənin iki okean tərəfindən əhatələnməsinin onu kənar təhdidlərdən qoruyacağı barədə köhnəlmiş konsepsiyaya dayanıb.
“FORTRESS America” planı çərçivəsində hərbi bazaların enerji ehtiyaclarını ödəmək məqsədilə portativ atom reaktorlarından, güclü akkumulyator qurğularından, həmçinin müstəqil mikroenerji şəbəkələrindən yararlanılması planlaşdırılır.
Bundan başqa, Müdafiə Nazirliyi sursat, yanacaq, vacib minerallar, tibbi ləvazimatlar və ehtiyat hissələrinin strateji ehtiyat fondlarının formalaşdırılmasını zəruri hesab edir.
Parnell bildirib ki, gələcək qlobal qarşıdurmanın bir neçə istiqamətdə cərəyan edəcəyi və qlobal təchizat zəncirlərinin qırılacağı ehtimalı mütləq nəzərə alınmalıdır.
O, bu layihəni genişmiqyaslı müharibə şəraitində ABŞ ordusunun əməliyyatlarının dayanıqlığını təmin edəcək əsas təhlükəsizlik aləti kimi səciyyələndirib.