Lider.com.az istinadən bildirir ki, Azərbaycanın Zəngilan şəhərinin erməni əsarətindən qurtarılmasından altı il ötür.
Silahlı Qüvvələrimizin 2020-ci il sentyabrın 27-də başladığı əks-həmlə əməliyyatları nəticəsində həmin yaşayış məntəqəsi həmin il oktyabrın 20-də azad edilib.
Müharibənin ilk günündən miqyasını genişləndirən ordumuz mübarizənin iyirmi dördüncü günündə Zəngilan torpaqlarına daxil oldu və oktyabrın 20-də düşməni geri çəkilməyə məcbur edərək bir neçə yaşayış məntəqəsini nəzarətə götürdü.
Zəngilan rayonunun kəndlərinin azad edilməyə başlandığı xəbərini dövlət başçısı, Ali Baş Komandan İlham Əliyev xalqa ünvanladığı müraciət zamanı elan etmişdi.
Prezident həmin çıxışında oktyabrın 20-də Füzulinin Dördçinar, Kürdlər, Yuxarı Əbdürrəhmanlı, Qarğabazar, Aşağı Veysəlli, Yuxarı Aybasanlı, Cəbrayılın Safarşa, Həsənqaydı, Fuğanlı, İmambağı, Daş Veysəlli, Ağtəpə, Yarəhmədli, həmçinin Xocavəndin Ağcakənd, Mülküdərə, Daşbaşı, Günəşli və Vəng kəndlərinin erməni işğalından azad olunduğunu bildirmişdi (dövlət başçısı həmin müraciətdə Vəng kəndinə Çinarlı adının verildiyini də diqqətə çatdırmışdı).
Daha sonra Ali Baş Komandan qüdrətli Azərbaycan Ordusunun Zəngilan rayonunun hüdudlarına daxil olduğunu vurğulayaraq Havalı, Zərnəli, Məmmədbəyli, Həkəri, Şərifan, Muğanlı kəndlərinin və Zəngilan şəhərinin azad edildiyini bəyan etmişdi.
Müzəffər hərbi birləşmələrimiz bu istiqamətdə də düşmən ordusuna ağır zərbələr endirərək canlı qüvvəsini və texnika arsenalını sıradan çıxarmışdı.
Zəngilanın işğaldan azad edilməsi sayəsində Azərbaycan hərbçiləri dövlət sərhədinə çıxmağa nail olublar.
Ölkəmizdə “Zəngilanın azad olunmasına görə” medalı təsis edilib və Prezidentin müvafiq Sərəncamı ilə həmin döyüşlərdə şücaət göstərən hərbçilərimiz bu mükafata layiq görülüblər.
Dövlət başçısının qərarı ilə oktyabrın 20-si Zəngilan Şəhəri Günü kimi qeyd olunmağa başlanıb.
Xatırladaq ki, Zəngilan rayonu 1993-cü il oktyabrın 29-da Ermənistan silahlı birləşmələri tərəfindən zəbt edilmişdi və işğal dövründə şəhər, kəndlər, eləcə də tarixi-dini abidələr tamamilə dağıdılmışdı.
Təcavüzkar ölkə bölgənin zəngin təbiətinə qarşı da ekoloji terror siyasəti yeritmiş, təbii yataqları vəhşicəsinə istismar etmiş, “Bəsitçay” dövlət təbiət qoruğundakı nadir Şərq çinarlarını kəsərək məhv etmişdi.
Bundan əlavə, Ermənistandakı Qacaran mis-molibden və Qafan filizsaflaşdırma kombinatlarının tərkibində normadan dəfələrlə artıq ağır metallar, fenol və radioaktiv maddələr olan çirkab suları Zəngilandan keçərək Araz çayına axıdılan Oxçuçayı zəhərləmişdi.
Ermənistanın töratdığı bu əməllər nəticəsində təbiətə külli miqdarda ziyan dəyib, çaydakı nadir balıq populyasiyaları tamamilə məhv olub.
Bütün bunlar beynəlxalq səviyyədə ciddi ekoloji terror aktı kimi qiymətləndirilir.