Lider.com.az istinadən bildirir ki, yol hərəkəti təhlükəsizliyinin təmin olunmasında əsas məram sürücülərə daha çox cərimə tətbiq etməkdən ibarət deyil, əksinə, yollarda baş verən qəzaların, ölümlərin və xəsarət alanların sayını minimuma endirməkdir.
Bunu Baş Dövlət Yol Polisi İdarəsinin (BDYPİ) İstismar və texniki təminat şöbəsinin inspektoru, baş leytenant Toğrul Quliyev açıqlamasında qeyd edib.
O bildirib ki, Bakı Ekspo Mərkəzində baş tutan “Road & Traffic 2026” – 14-cü Xəzər Beynəlxalq Yol İnfrastrukturu və İctimai Nəqliyyat Sərgisinə qatılmaqda başlıca məqsəd yol təhlükəsizliyi sahəsində tətbiq olunan yenilikləri geniş auditoriyaya təqdim etməkdir. Sərgilənən qurğular vətəndaşların sağlamlığının, rifahının və həyatının qorunması məqsədilə istifadə edilən üsullarla yaxından tanış olmağa şərait yaradır.
Yol Polisi nümayəndəsinin sözlərinə görə, təqdim edilən texniki vasitələrin əksəriyyəti süni intellekt texnologiyaları ilə uzlaşdırılıb. Xüsusi videoanalitik sistemlər potensial təhlükələri qabaqcadan müəyyənləşdirmək qabiliyyətinə və funksionallığına sahibdir.
Onun ifadəsinə görə, süni intellekt əsasında fəaliyyət göstərən sürət ölçən radar cihazı qayda pozuntusunu qeydə aldıqdan dərhal sonra məlumatı mərkəzi informasiya bazasına göndərir. Daha sonra isə heç bir insan müdaxiləsi tələb olunmadan sürücüyə qarşı inzibati cərimə qərarı avtomatik qaydada çıxarılır.
İnspektor diqqətə çatdırıb ki, sərgidə təmsil olunmalarının əsas səbəbi məhz həmin qabaqcıl avadanlıqları cəmiyyətə yaxından tanış etməkdir.
Sürücülərə müraciət ünvanlayan Toğrul Quliyev vurğulayıb ki, əsas məqsəd qəzaların sayını azaltmaq, yollardakı ölüm hallarının qarşısını almaq və hərəkət iştirakçılarının təhlükəsizliyini təmin etməkdir. O, sürücüləri sükan arxasında olarkən mobil telefondan istifadə etməməyə, piyadaları isə küçələri keçərkən daha diqqətli olmağa çağırıb.
O qeyd edib ki, diqqətin hətta cüzi şəkildə yayınması belə ağır nəticəli faciələrə gətirib çıxara bilər və bu istiqamətdə hər il daha genişmiqyaslı maarifləndirmə tədbirləri həyata keçirilir.
Hər birimiz bu məsələyə vahid ailə kimi yanaşmalıyıq. Məqsəd yalnız insanların yol hərəkəti sahəsində rifahını, əmlakını, sağlamlığını və həyatını qorumaqdır, – Toğrul Quliyev vurğulayıb.