Lider.com.az istinadən bildirir ki, noyabrın 3-də baş tutacaq Konqresə aralıq seçkilərində qələbə qazanacaqları təqdirdə, ABŞ Demokratlar Partiyası maliyyəçi Ceffri Epşteynin dosyesi ilə əlaqədar materialların üzə çıxarılması istiqamətində təhqiqat təşkil etməyi nəzərdə tutur.
Partiya təmsilçilərinin qənaətinə görə, Donald Tramp hakimiyyəti dövründə Epşteynin dosyesinə aid sənədlərin ictimaiyyətə tam təqdim olunması istiqamətində verilən sözlər tam tutulmayıb.
ABŞ qanunverici orqanının Nümayəndələr Palatasının Nəzarət və Hesabatlılıq Komitəsinin təmsilçisi Robert Qarsiya bu istiqamətin onların əsas prioritetləri sırasında yer alacağını bəyan edib.
Konqresmen qeyd edib ki, Epşteynin işi ilə bağlı araşdırma başlıca vəzifələrdən biri olacaq və cəmiyyət sənədlərin dərj olunmasını, bütün bilgilərin açıqlanmasını, eləcə də zərərçəkənlərin hüquqlarının bərpa edilməsini tələb edir.
Eyni zamanda, Qarsiya maliyyəçinin pul köçürmələri ilə əlaqəsi olan böyük maliyyə qurumlarının rəsmilərinin də dinləmələr üçün Konqresə dəvət oluna biləcəyini istisna etməyib.
Hazırlanan təhqiqatın paytaxt Vaşinqtondan kənarda, xüsusilə də ölkənin işgüzar dairələrində böyük rezonans doğura biləcəyi vurğulanır.
Xatırladaq ki, Ceffri Epşteyn 2019-cu il iyulun 6-da Nyu-York şəhərində saxlanılmışdı və ona qarşı azyaşlıların istismarı və insan alveri ittihamları irəli sürülmüşdü, lakin həmin ilin avqust ayında o, təcridxanada ölü tapılmışdı və rəsmi versiyaya görə özünə qəsd etmişdi.
Bundan əlavə, 2026-cı il yanvarın 30-da ABŞ Ədliyyə Departamenti Epşteynin işinə aid üç milyondan artıq sənəd vərəqinin, iki mindən çox video faylın və 180 min foto materialın paylaşıldığını bəyan etmişdi.
Həmin sənədlərdə bir sıra dövlətlərin siyasətçilərinin, iş adamlarının, diplomatlarının və tanınmış simalarının adları yer alsa da, bu fakt həmin şəxslərin hər hansı qanunsuz əməllərdə əli olduğunu qəti şəkildə sübut etmir.