Lider.com.az istinadən bildirir ki, bu gün Qubadlı şəhərinin düşmən tapdağından azad olunmasının ildönümüdür.
Azərbaycan Ordusunun 2020-ci il sentyabrın 27-də başladığı əks-hücum əməliyyatları çərçivəsində həmin il oktyabrın 25-də Qubadlı şəhəri erməni işğalından qurtarılıb.
İkinci Qarabağ müharibəsi dönəmində Cəbrayılda düşmən qüvvələrinə sarsıdıcı zərbələrin endirilməsi və Zəngilanda qısa müddətdə gerçəkləşdirilən uğurlu hərbi yürüşlər Silahlı Qüvvələrimizin Qubadlının sərhədlərinə daxil olmasına zəmin yaratdı.
Oktyabrın 26-da ölkə başçısı xalqa müraciətində Vətən müharibəsində məhv edilən və qənimət olaraq götürülən düşmən texnikasını ictimaiyyətə açıqladı, həmçinin ordumuzun oktyabrın 25-də Qubadlı şəhəri ilə bərabər, rayonun Padar, Əfəndilər, Yusifbəyli, Çaytumas, Xanlıq, Sarıyataq, Mollabürhan, Zəngilanın Birinci Alıbəyli, İkinci Alıbəyli, Rəbənd, Yenikənd, eləcə də Cəbrayılın Qovşudlu, Sofulu, Dağ Maşanlı, Kürdlər, Hovuslu və Çələbilər kəndlərini azad etdiyini elan etdi.
Qubadlı uğrunda döyüşlər son dərəcə qızğın və gərgin keçib.
Ermənistan ordusunun müqavimət xəttini yarıb keçən Azərbaycan əsgəri onları geri oturtmağa və darmadağın etməyə müvəffəq oldu.
Qubadlı istiqamətindəki hərbi əməliyyatlar zamanı qarşı tərəfin xeyli sayda canlı qüvvəsi və döyüş texnikası məhv edildi.
Azərbaycanda “Qubadlının azad olunmasına görə” medalı da təsis edilib.
Prezident İlham Əliyevin imzaladığı sərəncamlara əsasən, bu rayonun azadlığı uğrunda döyüşlərdə fədakarlıq və igidlik göstərən hərbçilərimiz həmin medalla təltif olunublar.
Dövlət başçısının digər fərmanı ilə oktyabrın 25-i Qubadlı Şəhəri Günü elan olunub.
Xatırladaq ki, Qubadlı rayonu 1993-cü il avqustun 31-də Ermənistan silahlı birləşmələri tərəfindən zəbt edilmişdi.
İşğal illərində ermənilər şəhəri və qəsəbələri tamamilə dağıdıb, tarixi, mədəni, dini abidələrimizi, qəbiristanlıqları vandalizmə məruz qoyublar.
Eyni zamanda, işğalçılar Qubadlının zəngin təbiətinə və flora-faunasına qarşı ekoloji terror törədərək meşələri qırıb və yandırıblar.