Lider.com.az istinadən bildirir ki, yaxın zamanlarda Ukrayna İsveç istehsalı olan ilk “Gripen” qırıcı təyyarələrinə sahib olacaq.
Bu barədə açıqlamanı Ukrayna lideri Volodimir Zelenski Brüssel şəhərində İsveç hökumətinin başçısı Ulf Kristersson ilə gerçəkləşdirdiyi danışıqlardan sonra verib.
Dövlət başçısı bildirib ki, tərəflər müzakirə zamanı ölkəsinin fasiləsiz zərbələrdən qorunması tələbatını, o cümlədən hava hücumundan müdafiə imkanlarının artırılması məsələsini nəzərdən keçiriblər.
Zelenski qeyd edib ki, həmin qırıcılar Kiyevin arsenalındakı F-16 təyyarələrinin imkanlarını tamamlayacaq və xüsusilə reaktiv mühərriklə təchiz olunan “Şahed” PUA-larının məhv edilməsində böyük rol oynayacaq.
Öz növbəsində, İsveçin Baş naziri Ulf Kristersson diqqətə çatdırıb ki, “Gripen” qırıcılarının Ukraynada istismara hazırlanması istiqamətində işlər aparılır və hərbi pilotlar müvafiq təlimlər alırlar. O, yeni hava gəmilərinin ölkənin müdafiə strukturuna qoşulması zamanı yaranan çətinliklərin müvəffəqiyyətlə aradan qaldırıldığını diqqətə çatdırıb.
Kristersson əlavə edib ki, 2026-cı ilin sonu və 2027-ci ildə Kiyevin maliyyə yardımlarına ciddi ehtiyacı qalacaq. Onun fikrincə, Moskvaya qarşı təzyiq vasitələri gücləndirilməli və Ukraynaya yönələn uzunmüddətli dəstək mexanizmləri daha da möhkəmləndirilməlidir.