Lider.com.az istinadən bildirir ki, Kuba Xarici İşlər Nazirliyi Amerika Birləşmiş Ştatlarının dövlət katibi Marko Rubionu Havanaya qarşı tətbiq edilən iqtisadi embarqonun aradan qaldırılması məqsədilə BMT qətnaməsinin qəbuluna mane olmaq üçün digər dövlətlərə təzyiq göstərməkdə ittiham edib.
Bunu Kubanın xarici işlər naziri Bruno Rodriqes Parrilya paytaxt Havanada təşkil olunan mətbuat konfransında açıqlayıb.
Hökumət baş katibinin sözlərinə görə, Rubio bir neçə aydır müxtəlif ölkələrin rəhbərləri ilə şəxsən əlaqə saxlayaraq onları Kubaya dəstək vermək fikrindən daşındırmağa çalışır.
Rodriqes Parrilya bəyan edib ki, bu cür təzyiqlər bilavasitə ABŞ dövlət katibi tərəfindən həyata keçirilir və onların əlində buna dair sübutlar mövcuddur.
Diplomatik idarənin rəhbəri xatırladıb ki, oktyabrın 27-28-də BMT Baş Assambleyasında ABŞ-ın Kubaya qarşı həyata keçirdiyi ticarət-iqtisadi, eləcə də maliyyə blokadasının ləğvi ilə bağlı qətnamə layihəsi növbəti dəfə müzakirə olunacaq.
Onun diqqətə çatdırdığına görə, bu məsələ artıq otuz dördüncü dəfədir ki, Baş Assambleyanın müzakirəsinə çıxarılır.
Kuba XİN başçısı iddia edib ki, Vaşinqton illərdir Havanı müdafiə edən ölkələrin mövqeyini dəyişmək məqsədilə diplomatik təzyiq mexanizmlərini gücləndirib.
Nazir xüsusi olaraq vurğulayıb ki, ABŞ-ın hazırda Kubaya qarşı yürütdüyü bu siyasət gələcəkdə istənilən digər dövlətə də şamil oluna bilər.
Buna baxmayaraq, Rodriqes Parrilya beynəlxalq birliyin böyük əksəriyyətinin qətnamə layihəsinin lehinə səs verəcəyinə inandığını bildirib.
Sənədlə bağlı səsvermə prosesinin oktyabrın 28-də baş tutması nəzərdə tutulub.
Xatırladaq ki, Rusi də Kubaya qarşı tətbiq olunan ABŞ məhdudiyyətlərinin ləğvini dəstəkləyən dövlətlər arasındadır və Rusiyanın Havanadakı səfiri Viktor Koronelli Vaşinqtonun başqa ölkələrin iradəsinə təsir göstərməyə səy göstərdiyini qeyd edib.