Lider.com.az istinadən bildirir ki, Rusiyada yaşayan tanınmış iş adamı Emin Axundova qarşı hədə-qorxu tətbiq edilərək 3 milyon dollar nağd pulunun və 10 milyonluq mülkünün mənimsənilməsi ilə bağlı cinayət işi üzrə məhkəmə prosesinin baxışına start verilib.
Bakı Ağir Cinayətlər Məhkəməsində baş tutan ilkin iclasda bu əməldə təqsirləndirilən Hikmət Vəliyev və Ramil Tağıyev hakim qarşısına çıxarılıblar, onlardan xaricdən gətirilən Hikmət həbsdə, Ramil isə azadlıqda yer alır.
İttiham aktına əsasən, əvvəlcə Ramil Tağıyev Emin Axundovu aldatmaq yolu ilə 870 min manatını ələ keçirib, daha sonra isə Hikmət Vəliyev və Vüsal adlı şəxslə birlikdə onu kriminal aləmdə "Lotu Quli" adı ilə tanınan şəxsin adından hədələyiblər.
Zərərçəkmişə "Lotu Quli"yə 20 milyon dollar borclu olduğu bildirilib və ödəniş edilməyəcəyi təqdirdə ailəsinə fiziki ziyan vurulacağı ilə hədələnib, nəticə etibarilə qorxuya düşən Axundov tələb olunan 3 milyon dolları və 10 milyon manatlıq əmlakı onlara verib.
Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin gerçəkləşdirdiyi istintaq tədbirləri nəticəsində təqsirləndirilən şəxslərə külli miqdarda əmlak əldə etmək məqsədilə hədə-qorxu gəlmə və xüsusilə külli miqdarda dələduzluq maddələri ilə ittihamlar irəli sürülüb.
Emin Axundov ölkə xaricində olduğu üçün iclasda şəxsən iştirak etməyib və onu məhkəmədə vəkil Esmira Tağıyeva təmsil edib.
Nümayəndə müvəkkilinin iş adamı kimi məşğul olduğunu və işlərinin çoxluğunu əsas gətirərək növbəti məhkəmə iclaslarına qatılıb-qatılmayacağının qeyri-müəyyən olduğunu qeyd edib.
Hakim Vüqar Quliyev bu mövqe ilə razılaşmayaraq bildirib ki, Emin Axundov birbaşa zərərçəkmiş şəxsdir və bütün araşdırma onun şikayəti əsasında aparılır, buna görə də nümayəndəyə müvəkkilinin gələcək proseslərdə şəxsi iştirakının vacibliyi tapşirilib.
İclas zamanı həbsdə olan Hikmətin müdafiəçisi hər hansı vəsatət qaldırmasa da, azadlıqda olan təqsirləndirilən şəxsin vəkilləri ilkin istintaqın gedişindən narazılıqlarını ifadə ediblər.
Ramilin vəkilləri müdafiə hüququnun pozulduğunu iddia edərək işin məhkəmə baxışına buraxılmadan prokurorluğa geri qaytarılmasını tələb ediblər və həmçinin "Lotu Quli" ilə bağlı epizodda onun iştirakını sübut edən heç bir dəlilin olmadığını vurğulayıblar.
Bunun əksinə olaraq, Emin Axundovun nümayəndəsi Ramilin də ilk iclasdandaca həbsə alınması barədə vəsatət qaldırıb, onun istintaqdan qaçmaq, yaşayış yerini dəyişmək və şahidlərə təsir göstərmək ehtimalını əsas göstərib.
Maraqlıdır ki, eyni statusu daşıyan təqsirləndirilən şəxslərdən Hikmət də zərərçəkən tərəfin mövqeyini dəstəkləyərək Ramilin həbs olunmasında maraqlı olduğunu bildirib və vəkili vasitəsilə sonuncu vəsatətin təmin edilməsini istəyib.
Tərəflərin irəli sürdükləri bütün vəsatətlər məhkəmə tərəfindən rədd edilib, çünki ibtidai istintaq dövründə kobud qanun pozuntularına yol verilmədiyi müəyyənləşdirilib və iş məhkəmə baxışına qəbul olunub.
Cinayət işi üzrə əsas məhkəmə iclası oktyabrın 29-na təyin edilib.
Xatırladaq ki, Rusiyadakı "Peton Holding" şirkətinin təsisçilərindən biri olan Emin Axundov daha əvvəllər də mediada müxtəlif səbəblərlə ad çəkdirib, o cümlədən Ufa şəhərindən Bakıya ağzına qədər pul dolu çamadanlar daşıması ilə gündəmə gəlmişdi.