Lider.com.az istinadən bildirir ki, Azərbaycan Respublikasının Prezidenti İlham Əliyev bu gün Gürcüstanın ölkəmizdə yeni fəaliyyətə başlayan fövqəladə və səlahiyyətli səfiri Qiorqi Zakaraşvilini qəbul edib.
Diplomat dövlət başçısına etimadnaməsini təqdim edib və daha sonra Prezidentlə görüş olub.
Azərbaycan lideri cari ilin aprel ayında Gürcüstana etdiyi rəsmi səfəri və həmin səfər zamanı göstərilən səmimi qonaqpərvərliyi xoş təəssüratlarla xatırlayıb.
Ölkələrimiz arasındakı əlaqələrin zəngin keçmişə və parlaq gələcəyə malik olduğunu qeyd edən Prezident İlham Əliyev müstəqil dövlətlərarası dostluq və strateji tərəfdaşlığın uğurla irəlilədiyini, xalqlarımızı isə qardaşlıq tellərinin bağladığını diqqətə çatdırıb.
Dövlət başçısı səfirə gələcək diplomatik missiyasında müvəffəqiyyətlər arzulayıb.
Qəbul üçün təşəkkürünü yetirən Qiorqi Zakaraşvili qardaş Azərbaycana səfir təyin olunmasından və ölkə rəhbəri tərəfindən qəbul edilməsindən qürur duyduğunu dilə gətirib, dövlətlərin strateji tərəfdaş, xalqların isə bir-birinə çox yaxın olduğunu vurğulayıb.
O, səlahiyyət müddəti ərzində Azərbaycan ilə Gürcüstan arasındakı tarixi əməkdaşlıq əlaqələrini daha da dərinləşdirmək üçün əlindən gələni edəcəyini söyləyib.
Görüş zamanı siyasi münasibətlərin səviyyəsindən razılıq hiss olunduğu bildirilib, iqtisadiyyat, ticarət, enerji təhlükəsizliyi, nəqliyyat və kommunikasiya istiqamətlərində əməkdaşlıq gündəliyi nəzərdən keçirilib.
Tərəflər nəqliyyat və enerji sahələrində birgə icra olunan layihələrə toxunaraq, onların təkcə region üçün deyil, həm də qlobal miqyasda böyük əhəmiyyət kəsb etdiyini vurğulayıblar.